Embedded Files
yavDaq jIQot. jImIS. wov jul, 'ach jIbIr. qen qaS wanI' potlh 'e' vISov, 'ach vIqawlaHbe'. pagh vIqaw.
SIbI' wab vIQoy. muDech tI Sar, 'ej tIvamDaq vIHlaw' vay'. vIleghvIpbe', wejHa' QIvqu'mo' ghu'wIj. narghchugh muSop neHbogh Ha'DIbaH, vaj-- maj! HISop.
'ach Ha'DIbaH Qob 'oHbe'. Qa'Hom mach neH 'oH. qaStaHvIS wa' tup mubej. muchovlaw'taH. vIbuQlaHbe' 'e' wuqlaw' 'oH. tI yoDDajvo' 'eD, 'ej tlhanchoH. vay' Daj larghlaw', Dermo' 'ej tormo' ghIchDaj.
« yImej ! » jIjach 'e' vInID, 'ach jItlhuplaH neH. vIqIp 'e' vInID, 'ach tlhoS ghopwIj vIpeplaH. SuvwI' Dun jIHbe' 'e' vItlhojqa'.
qaStaHvIS 'op tup, Qa'Hom vIbej. ghIq, wab chu' vIQoy. bom Qa'Hom. cha'logh Ham ghoghDaj, ghIq wa'logh pun. bom puj 'oH, 'ach bom'e' 'oH. wa' bom Qav.
tlhan, tlhan, Qa'Hom mach
nuq So'laH lam?
tlhan, tlhan, bItlhantaHchugh
chaq SIbI'Ha' potlh DaSam
tlhan, tlhan, Qa'Hom mach
'anbe'bej Qu'lIj
tlhan 'ej bItlhantaHvIS
van lutwIj
nuqDaq oH Suto'vo'qor'e'?
qatlh SuvwI' bey vIQoylaHbe'?
reH batlh jIvang 'e' vInID 'ach
bertlhamwIjvaD, bom Qa'Hom mach
chop, chop, Qa'Hom mach
Ho'Du' jej tI'ang
chop, chop, bIchoptaHchugh
SIbI'Ha' naHlet DaSang
chop, chop, Qa'Hom mach
not, not yIjegh
chop, 'ej bIchoptaHvIS
paw 'o'megh
« wa'leS much yaHchaq, ghomru tuq muchwI' chu'. Hoch, peSaH ! »
ghomru tuq Subpu' vaS lojmItDaq QInvam lanlu'pu'. vIHarlaHbe'. muchwI' tutlh ghajbe' ghomru tuq. wej Hogh pIq, nenwI' Dotlh vIchavDI', muchwI' tutlh vImoj jIH. 'e' vIQub...
'ej yaHchaq ? 'Iv yaHchaq ?
pay' vIqaw. tuqnIghqoqwI' ghaH loDvam'e'. 'IH leSpalDaj 'ej chu'taHvIS po'bej ghaH. 'ach vIpar. 'eDjenHey ghaH. vavDaj, SoSDaj tuqDaq noychoHlaHbe', tlhoy tInmo' tuqvetlh. vaj tuq mach ghajbogh qempa''e' Sampu', 'ej ghomru tuq muvpu'.
'ej DaH yaHwIj'e' nIHpu' jay'! taHqeq.
nav vIlaDtaH. « DaH muchwI' ghajmo' ghomru tuq, qunmaj lubopbogh bommey qon Hoch latlh 'e' tuchlu' »
nuqjatlh? DuHbe'! tuqwIj Subpu' lutmey vIja'laHbe'chugh... nuq vIja'?
SuvwI' Dun
Dun lutraj teH
lutraj vIja' vIneH neH
SuvwI' quv
quvwIj lunge'
tlhIHvaD vIbom 'e' luchaw'be'
Hegh qa'wI' bom
Dej DujwIj Som
SuvwI' Sub
SubIttaH'a'
lIbuQDI' HIvbogh jaghra'
SuvwI' qu'
chay' Suqu'taH
lutraj ghanglu'DI' chay' SutaH
Hegh qa'wI' bom
qatlh ratlhnIS lom
bIlujlaHbe'chugh, vaj bIQaplaHbe'
'ach bIlujpu'DI' Dap 'oHlaw' vIttlheghvetlh'e'
vISaHbe'
yapbe' toDuj, laH je
vay' DaneHchugh, yItlhap
pagh Danoblu'bej
lojlaw' Hoch 'ebmeywIj
'ach chaq wa' Doch vIlIj
SuvwI' jIH !
jIH tlhopDaq 'oH tuchwIj'e'
pa'loghwIj vIHoH
SuvwI'pu' !
pu'wIj vIwoH
Heraj vItlha', yInvam vIDoH
ghItlhwI' vIDut
DaH tagh tlhev lut
mubuQ'a' Humanvam? jIbejbe'. qab velbogh mIv tuQtaH 'ej pu' ghaj, 'ach vaHDajDaq 'oHtaH 'ej lo'ruplaw'be' Human.
« Qu' DanejtaH'a' ? »
Qu' vInejtaHba', 'ach HumanvaD vIchID vIneHbe'. vaj SIbI' vIjangbe'. Qorwagh Hur vIbejqa'. tengchaH bIngDaq DIngtaH yuQ. Qo'noS 'oH. juHwIj. Hov bIQ'a' luS yuQ. Hov bIQ'a'vetlhDaq vogh qaS Qu'wIj veb.
« Qu' QobvaD SuvwI' yoH vInej » jatlh Human. jIHemchoH, 'ach jatlhqa'. « Hoch ghIjbe'nIS je SuvwI' vInejbogh. bIpup. puq Darur, 'ej QoQ jan Dogh Daqeng. vabDot Qa'Hom DaghIjlaHbe'.»
DaH jIQeHchoH. « taHqeq! chotIch'a'? »
« ghobe'. qanaD. laHmeylIj yIghov. bIHoSbe'law'; vaj jaghpu'lI' DamerlaH.»
Human qeS vI'IjnISbe', 'ej munuQ mIv tuQwI'vam. 'ach jeQ ghaH 'ej chaq Daj Qu'Daj. SupghewwIj vIQIq 'ej 'oplogh vIyach. jIjatlh: « toH. poH ngaj vIghaj. yIjatlh.»
SuyDuj vImuv net jalchugh
naSbogh weHwI' nov vISuv
batlh vIchargh
'ej ghIq ngevwI'vaD jIbom
'ej ghIq ngevwI'vaD jIbom
bIghHa' Duj vImuv net jalchugh
lotlh 'e' nIDDI' javpu'
vImevmoH jIH
'ej ghIq 'avwI'vaD jIbom
'ej ghIq 'avwI'vaD jIbom
tInqu' 'u'
law' 'ebmey 'ej Sar
Qatlh wa' wIvmeH Qu' DaH 'e' vIHar
QeD Duj vImuv net jalchugh
wo' boQbogh cham chu' vIQan
yotDI' jagh
'ej ghIq tejwI'vaD jIbom
'ej ghIq tejwI'vaD jIbom
tInqu' 'u'
law' 'ebmey 'ej pov
chay' qaqwI' vIngu'?
-- HEY KLINGON!
-- ...nuqneH?
-- Qu' DanejtaH'a'?
...chaq tugh vISov
DujDaq jIHtaH. muDech wabmey Huj. Du'Daq jInenchoHbe'; chuS Dujmey 'e' vISov, 'ach tlhIngan Duj wabmey vItIv. Duj vI'elDI', namtum lurur. DaH muHIvlaw' wabmey. jatlhtaH je Human.
« wa'maH vaghleS jurya loS wIpaw » jatlh. janSIn 'oH pongDaj'e' 'e' vIqaw. « ghIq bavtaH Ship B 'ej DoS wIghochchoHmeH, yuQDaq maghIr maH. »
« nuqjatlh ? bavtaH nuq ? »
« Ship B. Dujvam. » jatlh. jImIS 'e' tu'mo', jatlhqa': « DIvI' Hol DayajlaH, qar'a' ? »
Do'Ha' Holmey laH vIghajbe'. DuSaQDaq DIvI' Hol wIHaD, 'ach not vIqIm. gharwI', Duy joq vImojlI'be', vaj qatlh Human Hol vIghojnIS? nIv tlhIngan Hol net Sov 'ej vabDot tlhIngan Hol jatlh jogh roghvaH bID. 'ach DaH SaHDI' Human, DuSaQDaq vIbuSta' 'e' vIjIn.
jIjang. « loQ vIyajba'. 'ach < SIbIy > vIyajbe'bej.»
« Ship B. tlhIngan Hol lo'taHvIS... chaq < Duj bay > DajatlhlaH. pInwI' yo' Duj cha'DIch 'oH.» SeHlaw DungDaq vIH nItlhDu'Daj 'ej chuSqu'choH Duj.
Duj bay ? pongvam qab law' Hoch qab puS ! Human retlhDaq 'oHtaHbogh quSDaq jIba'taH 'ej jIH vIbej. tlhoy tun quS. tlhoy tIn jIH. Qu'wIj vItagh neH, 'ach wejHa' mutung Hoch. jItlhuptaHvIS jIjatlh, « chay' bom qotlhbogh ngay''e' vIbaj, chuSbogh rorbogh pong QIv ghajbogh DujDaq jIlengtaHvIS ? »
jIHvaD jIjatlh 'e' vIHech 'ach jang Human. jatlh « chuSbe' DujwIj; bom. rorbe' 'oH; pI'. ej pongDaj'e'... » mon ghaH, ghIq jatlhqa': « qatlh potlh vay' pong ? lavvaD tlhaghnay wIper, / 'ach pIm pongDaj net jalchugh, povtaH pIw. »
mumerqu' mu'tlheghvam, 'ej jImon je. tlhIngan qonwI' Dun revlaHchugh Humanvam, chaq tlhIngan bom qotlhqu' DujDaj !
yuQ chImDaq leS HeSwI' val
tlhab 'e' maqlaw' San
HeSDajmo' Hem
vabDot Sub ghaH 'e' jem
'ach Qanbe' Debvam Do'ol
pawDI'
Duj bay
chalDaq vIHtaHbogh Hov rur
'ach cholDI' Som pI' Seng vI' HeSwI' qur
Duj bay
qIjchu' ramvam chal
'ach ruv junlaHbe' HeSwI' val
QaDtaH QI' pegh neHba' qumwI'pu'
luSo'; naHlet mollu'bogh lururmoH
'ach SIbI'Ha', naHlet yob ghoqwI' Do'
chay' vang qum?
'Iv rItlaH?
Duj bay
cheS ghochbogh wamwI' rur
Duj ror pIvghor chu' 'orwI'; jorlaw'
Duj bay
yajlaHpa' ghoqwI' Dogh
Hegh 'ej Hegh pegh nIHta'bogh
batlhvaD vangnIS vay' vaj vang Duj bay
loQ mabeb rur nov. Humlaw' DIr tun 'ej yItDI' tlhoS Suplaw'. wej mInDu' ghaj, and reH monlaw' nujDaj tIn. mutvam vIghovbe'. yuQDaj pong jatlh, 'ach vIghovbe' 'ej vIqawbe'.
puH yIQ Dab novvam 'e' vIloy, 'ach QaDbogh puH beQ wIleng 'ej qay'be'law'. not bep, not Doy'choH, 'ej vabDot tlhIngan Hol jatlhlaH ! DevwI' mIt ghaH. gheDmaj wISammeH nuboQ.
DaHjaj qelI'qam law' wIlengpu', 'ej maQongrup jIH, janSIn je. 'ach jo'ley' tlhopDaq ba'choH wImrew 'ej chal bej. vIghoS.
jatlh ghaH: « Dotrarmey tlhIngan DaghovlaH'a' ? »
chal vInuD. Qo'noSvo' qelI'qam puS wIlengpu' vaj loQ pImlaw' Hov jorchan. vISIqtaHvIS jIjang. « HIja'. pa' ghochwI' tu'lu'. »
« wej Hovmey neH yugh Hoch nughwIj Dotrar, vaj nom chen bIH Hovtay'maj mejlu'DI'. tlhoS pagh vIghov jIH. 'ach pa' » -- SIq ghaH -- « HovwIj 'oH Hovvetlh'e'. wej Hovmeyvetlh yugh DotrarHom chu' vIperbogh. »
jIjatlh: « tlhoy nap DotrarlIj. wej Hovmey neH lo'taHvIS, nuq bochenmoHlaH? »
« maHvaD wa' ghot 'oS Hoch Dotrar. ghot mInDu'mey 'oS wej Hovmey. »
Qatlh nov yajmeH Qu', 'ach 'IQ ghaH 'e' vIHar. SIbI'Ha' meq marIchtaH 'e' vItul. 'ach ngaj ram 'ej wa'leS malengmeH, DaH maQongnIS.
wej Hovmeyvetlh
wej mInDu' tIbej
wej ben qorDu'wIj yuQwIj je vImej
wej maH loghqam, wej chuq tIq
qaStaHvIS wej DIS juHwIj vIlegh
'ach wej pa' vIchegh
wej lurghmeyDaq
wej chal jorchan ghe'
wej much yaHmey chIm rurmo'
tIng, 'ev, chan je
teH: vey' Hovmey, 'ach Dotrar weS
qaStaHvIS wej DIS wa' mIch vIbej
'ach wej pa' vIchegh
yu, bIm, 'egh
wej pa' vIchegh
tIDaq jISo'egh. yIQ tI 'ej loQ SutwIj HaHchoH. pIw Huj law' tu'lu': yav yIQ, 'InSongmey, Ha'DIbaH qeQ. pIwmey but. tugh qaS tlhom 'ej wejHa' HurghchoH chal.
cha' Ha'DIbaHmey vIbej. ngem ngeng retlhDaq cha' gha'chermey tu'lu'. toH, loQ gha'chermey rur, 'ach qaSpa' jajvam, not Ha'DIbaHvam Segh vIleghpu'. pu'Du' ghaj, 'ach SuvlaH 'e' vIHon. Do'Ha' qaD 'oHbe' chonvam'e' 'e' vIloy. 'ach vay' vIHoHnIS 'ej gheD qaq vISamta'be'. tajwIj vI'uch.
DopwIjvo' ghoS ghogh. « ooooo » jatlh. wImrew ghogh 'oH. jIwam 'e' vIwuqDI', mutlhejmeH tlhob, 'ej jIQochbe'. 'ach DaH vIpay. tlhoy chuS.
SIq ghaH. « Sarghmeyvetlh tIbej! 'IHqu', qar'a'? »
« HISlaH. magh HaHchoHDI' 'Iwchaj, 'IHqu'bej! »
« nuqjatlh! » poSchoHchu' wej mInDu'Daj. « ghobe', ghobe', tIHoHQo'! »
« qatlh? 'uQ wIpoQ. »
lImlaw', ghIq qech ghajchoHlaw'. << lutmey Daj DanejtaH, qar'a'? »
« bIlugh. »
« toH, qaSlI'bogh lutvam yIqel! Ha'DIbaHvam Segh vISov. qaStaHvIS qImroq tuj, bogh ghu. ghIq, qaSpu'DI' wa' DIS, SoS mejnIS. 'ach not mej neH HojnIy, vaj SoS tlhe' 'e' nID 'ej 'e' nIDqa'. SIbI'Ha', qejchoHchu' SoS, 'ej vabDot puq mejmoHmeH, HIv. Daj, qar'a'? »
Dajqu'be' lutvam, 'ach gha'cherqoqmey vIqel. wa' tIn law' latlh tIn puS; chaq HojnIy 'oH puSwI'. 'ej tInwI' yIvbej puSwI'. chol, ghIq DoH, ghIq cholqa'. Harghbe'bej bIH; 'ach chaq ghu'vam bopbogh bom Daj vIqonlaH. chaq laHmeywIj qotlh Qu'vam. teH: qaDvam Qatlh law', chonwIj Qatlh puS. 'ej bom vIqonta'DI', ghIq bIH vIHoHlaHtaH.
« lu' » jIjatlh. « mabej »
wa' ben pupHa' boghpu' ghaH, taghDI' qImroq tuj
SIbI' wov'on wa'DIch chenmoH, roSDI' SoSDaj nuj
qaStaHvIS jarmey veb, tay' puq SoSDaj je
SopmeH, QalmeH, Hub'eghmeH puq ghojmoH nenwI'
vaj taghqa'DI' qImroq tuj, pagh pIH HojnIy mach
'ach wa' jaj qel SoSDaj 'ej paybe'taHvIS jatlh:
DaH yIme-e-e-e-ej
DaH yIme-e-e-e-ej
'opleS chotlheDnIS net Sov
mItlaw' jajvam vaj HItlheD
majQa'! Sargh nenwI' Damojta'
meqvammo' bIratlhlaHbe'
DuSeH pagh; bItlhab chu'
DaqlIj tlhIn yISam, loD Qup
not qaleghqa' vIneH
DaH yIme-e-e-e-ej
yay'chu' HojnIymaj, QapHa' teSDaj 'e' Qub
qaStaHvIS wa' DIS yInDaj, reH tlhejtaH qaytu'
chaq qID, chaq qaD, chaq nep, chaq wIvDaj choHqang
vaj tlhe'DI' SoS, ghaH 'em ghoS, Sargh puqna' Da
'ach wIvDaj Honbe'chu' SoS, 'ej cholDI' puqloD matlh
beQchoH qoghDaj, wanchoH pobDaj, ej ghughughtaHvIS jatlh:
DaH yIme-e-e-e-ej
DaH yIme-e-e-e-ej
jIjatlhchu' 'e' vIHar
'ach bIyajbe', bIQamtaH neH
majQa'! Sargh nenwI' Damojta'
'ej tugh bogh be'nI'lI'
jIbuSnIS; yabwIj Danlu'
bIqay', 'ej qabamqangbe'chu'
DuchuHjaj wa' mu':
yIme-e-e-e-ej
SoQHomvam jatlhDI' SoS 'ej yajlaw'DI' puqloD
Sumbogh ngem ngeng bIQ Dem 'el, 'ej ghaHvo' QalchoH
wa'vatlh logh nItebHa' bIQvetlhDaq reHpu' chaH
DaH 'er'InDaq bej neH HojnIy, megh'an ghoStaH ghaH
latlh ngeng HeHDaq pawDI' SoS, tagha' puqloD ghan
'ej loStaH 'e' tu'DI' ghaH, Qavbogh mu' puS jatlh:
DaH yIme-e-e-e-ej
DaH yIme-e-e-e-ej
yIDum, yIQal, yISop
ngemDaq 'ebmeylIj tInej
majQa'! Sargh nenwI' Damojta'
SoSlI' DapoQtaHbe'
tugh tInchoH pu'Du'lIj
tugh Sargh loD HoS SoH puqwI'
'ach qaSpa' wanI'vetlh
yIme-e-e-e-ej
« peQchemHey lInglaw' tIvam. Qapbe' Hoqra'. raQ wIcheghnIS. wa'leS wItaghqa'. »
mIv tuQtaH Human 'ej vaj taQ ghoghDaj 'ej qab So'lu'; Quchchugh, QeHchugh, pagh QoSchugh, vISovchu'be'. munuQ ngoDvam.
jIjang. jIjatlh: « ghobe'. qaStaHvIS jajmey law' mave' 'ej pagh wIta'. yuQvamDaq vay' nejlI' DoS 'ej ghaytan tugh Samta'. Qoylu'taH. mataHnIS. » yIt 'e' mev janSIn, vaj vImevpu' je jIH.
« 'ej chay' DoS wItlha'laH, Qapbe'chugh Hoqra'meymaj? » jatlh ghaH, ghoghvetlh taQ lo'taHvIS. «ghochwI' po' SoH 'e' vISov, 'ach tugh Dor pem 'ej HurghDaq bIghochlaHchu'be'.»
jorchan vIqel. nuDech Hujbogh tI nov. DuQwI'mey yugh San'emDervam pormey. Deb tI bIHbe', 'ach Deb tI lurur. bIQ puS poQ 'e' vIloy. vabDot He'So'. rewve' teb pIwDaj tlhorgh. mIvvetlh tuQtaHmo', ghaytan pIwvetlh larghbe' Human 'e' vIqeH. jIjangrup 'ach pay' vImev. vay' pIm vIlarghchoH. loQ Qenvob, loQ qeSnoDmaj taplu'pu'bogh rur.
jImon. « wIchol. vIlarghlaH.»
« bISorHa' 'e' vItul » jatlh janSIn, 'ach pu'Daj 'uchchoH.
pay' numuvqa' wImrew. nom lenglaH mabeb novvetlh 'ach pIj vay' Daj legh 'ej DachchoH. DevwI'maj'e', po'be' ghaH. DaH nucholtaHvIS tlhoS SuptaH; pe'vIl 'uSDu'Daj tIq wanmoH 'ej SIH.
« maw'wI'pu'! qatlh naDev boghoS? naDev Qapbe' cham! »
« net Sov » jatlh janSIn, De'wI' mach peptaHvIS. chu'taH 'ej chu'Ha'taH jIHDaj. rut yamtaw jobmey, rut Qu' De', DoS mIllogh je cha'.
De'wI' chol wImrew 'ej ghel. « qatlh mIlloghvetlh Daghaj » jatlh.
« DoS ghaH » jatlh janSIn.
Hagh wImrew, qID pIHmo', 'ach ghIq SaghchoH. « DuHbe'» jatlh. « nuvvetlh vISov. Heghpu'. ben law' Heghpu'.»
ngabbogh jul
Dechbogh nagh
wovbe' qul
numagh mInDu'maj
majegh'a'
HoSbogh SuS
bIQ notron
ghewmey chuS
nulon teSDu'maj
majegh'a'
not majegh maH (*maH!*)
wejHa' maSaH (*SaH!*)
ghorgh mavenglaH (*DaH!*)
Qoylu'taH Qoylu'taH
lojbogh Soj
chImbogh nuj
buqmey woD
pujchoH porghmeymaj
majegh'a'
'ul tI nov
peQchemHey
chammaj notlh
qey Hoqra'meymaj
majegh'a'
« DuHbe' » jatlh wImrew. « nuvvetlh vISov. Heghpu'. ben law' Heghpu'. »
vIyu'choH, 'ach nom vImev, ngugh bach tu'lu'mo'. « pum!» jIjatlh, jachtaHvIS. lav 'emDaq jI'ung. muQan tI 'e' vIHon, 'ach chaq muSo'laH. janSIn qIppu' bach wa'DIch, 'ach Qanpu'law' SIryoDDaj 'ej DaH pu' lellI'. mach'eghmoHpu' wImrew 'ej yavDaq Qot, vIHbe'taHvIS.
pay' nargh namyaS tuQbogh nuv 'ej ghopDajvo' janSIn pu' pup. ghIq ghaHvaD bachrupqa', 'ach bachlaHpa', lavvo' vIron 'ej qamwIj lo'taHvIS, jagh vItangmoH. pu'Daj lo'laHbe'meH yebDaj vIghor, ghIq yan wIQIq 'ej vIpep.
'ach vIHIvlaHpa', pay' jIbIrqu'choH. chuch mojlaw' rewve' 'ej taDchoH 'IwwIj. jIvIHlaHbe', tlhoS vItlhuHlaHbe'. 'ach jagh qab vIleghchu', pumpu'mo' namyaS. tlhIngan ghaH!
'oy'ba' yebDaj 'ach 'ebDaj ghovDI', jon. ghop poS lo'taHvIS, pu'Daj woH, rowIjvaD Qeq, 'ej bach.
________________________________________________________________________________
jIvemDI' QongDaqDaq jIQot. tlhoy tun 'ej loQ jIroplaw'. mu'oy' rowIj 'ach 'Iw, Sev je vIleghbe'. QongDaq retlh quSDaq ba' wImrew. vIqInDI', SeychoH. « bIyIn, bIyIn! » jatlh.
« quSDaq bIba' » jIjatlh. « mumotba' neH jagh pu'. 'ach 'Iv tlhIngan loDvetlh? DoSma' wIghochlI' 'e' vIHar, 'ach Human be' ghaH DoSma''e'. boqpu''a' chaH? 'avwI'Daj ghaH'a'? »
« 'ach wIHIvlu'pa', ngoDvetlh vIQIj 'e' vInID! DoSlIj ghaHlaHbe' be'vam'e'. ben law' Heghpu'! »
« bIbej'a'?»
jangmeH tlhe' 'ej tlhoy' SIq. tlhoy'vo' HuS be' cha'bogh mIllogh'e'. be'vam vIghovbej: DoSma' ghaH.
QIj wImrew. « jIy qumwI' 'oH pongDaj'e'. yuQvam qun wIchoqtaHvIS maghojmeH tej waw'vam cherta'. 'ach... tlhoS wa' vatlh ben cherta'.»
QIt jIQamchoH 'ej mIllogh vIchol. qanlaw' be'vam, 'ej qanlaw'be' DoSma', vabDot rurchuqchu' chaH. chaq SoSnI', puqnI'be' chaH? mIllogh bIngDaq mu'tlhegh ghItlhlu': « qun yIvoq. qun yIchoq »
'ach ghu'vam taQ bopbogh qun'e' Sov 'Iv?
qun yIvoq, qun yIchoq
tayqeq ngong'a'maj De' 'oS ramwI'qoq
qun yIvan, qun yIQan
chay' pa'logh poymar DIpan? chay' DIpan?
qun yI'Ij, not yIlIj
nuDevmo' ngoD bIQ'a'Daq machIj
not yoqpu'vam DIqIHlaH
vabDot bong pu'jIn nutey'pu' chaH
qun qon charghwI'pu'
qatlh qun qar qonbe'?
pIghvaD qengHoD DamDI'
Qaqqu' qun tej
chabalDaj qenglaHchugh, chuvmey Qaw'qang
qun qaq choqlaHchugh, Hoch latlh qunmey Sang
qun yIlaD, qun yIHaD
qunqoq qutlh qonDI' qoH, qun yIqaD
qun yIQorgh, paQDI'norgh
bov veb wIyajmeH 'utbej bovmey vorgh
qun yIvuv, qun yIwuv
pa'logh vI'laSDaq tojwI' DISuv
wovmoHwI' Da qun
wIchoqchugh, wIvoqchugh
rut qunmo' maHembe'
quvbe' 'op quH
qunwIj tlhIn boqelDI' Do'Ha' jItuH
vabDot QaghmeywIj vIqel, 'ej jIghoj
qun QanQo' qumwI' vaj qumwI' vImoj
DISmeyDaq Hurgh, 'ach wovmoHwI'majmo', loQ maleghlaH. tInbej DIS pa'Hey, vabDot loQ mavIQlaw', vIHbe'mo' rewve'. mayItDI', nutlha' ya'rIS. vemmey vInejtaH, 'ach Hurghmo' DIS 'ej nagh yughmo' ravDaj, Qatlhqu' Qu'vam.
qaStaHvIS repmey puS mayIttaH, 'ej mu'oychoHmoH 'uSDu'wIj. vIbachlu'mo' jIbepQo', 'ach mamev 'e' chupDI' wImrew, jIbepbe' je.
« raQmaj wIchermeH DIS pat wImej » jatlh.
« va » jatlh janSIn. « bIlugh. pagh vem Daleghbej'a', tlhev? »
« HIja' » jIjatlh. « DIn wIlo'bogh lo'bej je ghaH. 'ach DaH ngablaw' Hoch vem. »
mIv tuQtaH janSIn, vaj qabDaj vIleghlaHbe'. 'ach belHa'moH ghu' 'e' vISov. nuHIvDI' jaghvam, numerpu'. qaSpa' wanI'vetlh, Qu'mo' wIwam. DaH, manIv 'e' matobmeH wIwam.
buSHachvam qagh wImrew ghogh. « tlhev » jatlh. « yuQvam qun Qan neH qumwI' jIy vIjatlh 'e' Daqaw'a'? vay' qa'ang vIneH. » He vorgh lon 'ej DIS wonmughHey 'el. matlha' 'e' ghaSmeH qel janSIn.
wonmugh wIchIqDI', DIS pa' tInqu' wI'el. wa' DopDaq ngeng wutlh tu'lu', 'ej 'oHvo' 'et wovmoHwI'maj tamghaymey. Dop DopDaq, beQ tlhoy' 'ej 'oHDaq law' mIlloghmey, yamtawmey tIQlaw'.
'IHqu'. « nuq 'oH? » jIjatlh, jIyay'taHvIS.
QIj wImrew. « SanIDmey ben Heghpu' yuQvam Sungpu'. » jatlh. « naDev pawDI' Hov lengwI'pu', wejHa' ngebpu' tayqeqchaj. 'ach ratlh chuvmey puS. »
tlhoy' vInuD. Ha'DIbaHmey, yoqpu' nov je Dellaw' mIlloghmey. 'ej HolHey 'oS yamtawmey. pe'vIlHa' yamtaw vIHot. « Holvam Dayaj'a'? »
« ghobe'. DaHjaj yaj pagh. nuq jatlh novpu'vam? maloylaH neH. »
« jIloy'nISbe' jIH » jIjatlh. « Doch'e' neHbogh Hoch neH chaH: lutchaj bon. »
mangoj
maHoS, mapuj
maQam, maba'
maghoj
maQup, maqan.
majQa'
majaq: maDev, matlha'
mamaq: naDev maHtaH
mangoj
maSar, marap
malob, mara'
maHoj
maloS, mavang
majQa'
======================
SaD bIp ben bom SIntlherpu'
DaH 'an'orchaj DItu'
ratlh Homchaj, vemchaj neH
SaD bIp nem nargh northammaj
vaj 'an'or San wIlaj
ghIt bIQtIq, nuvelbeH
wa' Dol nIvDaq matay'DI' maQap
reH tay' ghot tuqDaq je
wa' Dol nIvDaq matay'DI' maQap
reH DuSIgh qorDu'lIj.
Hurgh. Hurghqu'. Hughchu'. latlh mojaqmey vIlo'laH 'ach bIyajbe'. Qapbe' mInDu'wIj pagh 'achghej'e' vIbej.
QIt yuv retlhDaq jIHot. wovmoHwI'wIj vIchaghpu'ba'. 'ach nuqDaq 'oH?
jI'Ij. jImoblaw'. bIQ vIQoy. SuS Hop je. wabvetlh vItlha'chugh, ghaytan DISvam vImejlaH. 'ach latlh wab vIQoy je. Hop je. 'ach ghogh 'oH. tlhIngan Hol mu'mey jatlhtaH. QIllaw' jatlhbogh nuv.
wovmoHwI' vInejtaH 'ach qey Qu'vam. vIwIvnIS: DIS chob DIn vIjaH'a', pagh tlhIngan Hol jatlhwI' vIjaH? ghaytan jaghwI' ghaH jatlhwI''e'; vaj vIHIvnIS. wovmoHwI' ghaj ghaH, pagh maHIvchuq maleghlaHbe'taHvIS.
QIt DIS chob vIghoS, 'ej tamHa'choH ghogh. DaH mu'mey vIyajlaH.
« HIDoH, HIDoH jay'! naDev pawmeH loghqam law' vIlengta'! Qu'wIj vIta'pa' choHoHlaHbe'! »
jangmeH latlh, ghughugh. SIbI' jIyaj. mIl'oD 'oH! 'ej jaghwI' HoHlI'! jIqet vIneH 'ach vIleghbe'taHmo' nom jI'eD neH, He vIHotmeH DeSDu'wIj vIlo'taHvIS.
« pu' vIghajbe' 'e' vIchID, 'ach meqleHvam vIlo'vIpbe'! » jatlh ghogh, jachtaHvIS.
qoghwIj vIHot. pu' vIghajbe' je jIH. yanwIj neH vIghaj. vIQIq. naDev SIH chob. vItlhe'DI', loQ tamghay vIlegh. nom vIghoS. SIbI' ghu' vIleghchu'. SaH tlhIngan jaghmaj, 'ej SaH je rabbogh mI'loD nov! jopruplaw' mIl'oD. jIqelpa', jIyov. nItebHa' Suv tlhInganpu'!
mInDu'lIj DapoSmoH
'achghej neH tu'lu'
nujlIj DaSoQmoH
qey beylIj qu'
tamchu'
bIHu'
bIHeghpu''a'?
tlhoy tIn molvam
naDev qa'lI' DachIlchugh
not DaSam
QIbDaq
bImob 'e' DaHar 'e' DamaS'a'?
QIbDaq
bIjub (bIjub bIjub) 'ej naDev qaS tuch naQ 'a
QIbDaq
bIyu' (bIyu') bItlhob (bIyu') bISIv (bItlhob)
ya'rIS Daje'
not Dujang QIb
bISo''egh DaneH
'ach wejHa' Duvelchu'
bIloS 'ach naDev bIvIbbe'
ghopDu' Dapep
nagh neH
DaHot
ngab chal
ngab jul
ngab Hoch latlh ghot
QIbDaq
bImob 'e' DaHar 'e' DamaS'a'?
QIbDaq
bIjub (bIjub bIjub) 'ej naDev qaS tuch naQ 'a
QIbDaq
bIyu' (bIyu') bItlhob (bIyu') bISIv (bItlhob)
ya'rIS Daje'
not Dujang QIb
qaSpa' DIS lengwIj, not jul wov vISaHqu'. 'ach DaH vIQej. mInDu' vISoQmoH 'ej julDaq qabwIj vIQeqmoH vIneH, 'ach mubot DujwIj; nom jagh mojqa' jagh Deq.
tlhIngan ghaHbej jaghvetlh Deq'e'. tIq jIbDaj 'ej run rolDaj. SuvwI' ghaHbe'law', 'ach mIl'oD nov wISuvtaHvIS, yoH 'ej Heghbe'; rurbogh boqwI' vIlajlaH. may' mavanpu'DI', meqleHDaj vItlhappu'.
DaH jIjatlh. «'Iv SoH? »
« jIHvaD jul ponglu'. jul tennuS. »
« jul tennuS? pong 'Iv? tey'pu'lI' ? »
« juppu'wI'. jaghpu'wI'. per yuD 'oH. »
per taQ QIj ghaH 'e' vIra' vIneH, 'ach ngugh paw janSIn, wImrew je, qettaHvIS. buQtaHbe' jul SIbI' 'e' tlhoj janSIn, 'ach pu'Daj lel muHoy'pa'. ghIq jul buq poQ. nob neHbe'ba' tlhIngan, 'ach yanwIj, meqlaHDaj vI'uchtaHbogh je, janSIn pu' je ghanDI', nobqangchoH. buqDaj poSmoH janSIn 'ej Dochmey ngaSbogh nuD.
« vIqraq lunIHlu'pu'bogh » jatlh. « toH! DoSmaj SoHbej. 'ach chay' Hung mIllogh qonwI' Datoj'a'? be' wIghochtaH 'e' wIHar. »
« jIy qumwI' » jatlh jul. « muboQ ghaH. ghaHvaD jIvum. »
qagh wImrew. « DuHbe'! » jatlh, wej mInDu'Daj poSmoHchu'taHvIS. « ben law' Heghpu' jIy qumwI'! 'e' Sov Hoch mIDvam ngan. »
« Ahh... bIlugh. Heghpu'bej. 'ach muboQ je. tIq lutvetlh. »
ghaHvaD pu' QeqmoH janSIn. « maj. lutmey tIvqu' tlhev'e', 'ej poymar QIjDI' vay', jIQuchchoH jIH. vaj yIjatlhchoH. »
baw'Ha'choH jul, 'ach jatlhchoH. « wa'maH ben, HeS Dun vI'ogh 'e' vIHar. lupwI' mIr vIHej 'ej cha'pujqut vInIH 'e' vIHech. Qapbe' nabwIj. wa' ghIgh neH vISuq. 'ach... ghIgh motlh 'oHbe'... »
wa'maH ben ba' wej 'eDjen
tachDaq QuS HenwI'vam 'en
tlhupbogh wej ghogh So'ba' Hutvagh chuS
ghuvpu' Deq chaH cha' loD'e'
pongmeychaj (lu)qawlu'be'
'a per yuD ghaj loD Qav: jul tennuS
chutmey, ngup je vuvbe' chaH
vaj Sep veH retlhDaq nejtaH
puH beQDaq wa' vengHom le' luchov
mach 'ej mobqu' vengvam bIr
'ej ram botlhDaj chIq lupwI' mIr
HeSvaD mItbej Daq 'e' lughov
jul tennuS, ghaH Dun law' Hoch Dun puS
wa' jaj net maq, tagha' net Sov
jul tennuS, ghaH Dun law' Hoch Dun puS
HeSvaD mItbej Daq 'e' lughov
ramvetlh wejlogh Qoylu'pu'
bIQtIQ bebDaq Sachchu' chuch
puH beQ rewve' taDmoH QaDbogh SuS
nIn, Soj, latlh jo je SuqmeH
vengHomDaq mev lupwI'
'ej tlharwIl DujDaq toS cha' loD yuD
vengHom HayDaq loS wejDIch
'ej ghaHvaD narghDI' lupwI' tlhIch
latlhpu' ra'; jatlh: DaH tagh nabmaj pov!
qabDajDaq pu' Qeqlu'mo'
chungHa'wI' chu' beq jonlu'bogh
HeS nIv wewmoHtaH ram maSwov
jul tennuS, ghaH Dun law' Hoch Dun puS
wa' jaj net maq, tagha' net Sov
jul tennuS, ghaH Dun law' Hoch Dun puS
HeS nIv wewmoHtaH ram maSwov
DaH yIqIm, rurchuq Hoch HejwI' ngoQ
lo'laHwI' ngaSbogh 'aplo' poQ
'ej nom 'aplo'vam Dam HejwI'ma' Doj
'ach popvetlh cholDI' DevwI'
'ej 'aplo' lojmIt teqDI'
ngoD 'ut lulIjpu' SIbI' 'e' tlhoj
QI'lop jaj mejpu' lupwI'vetlh
'ej QI'lop jaj reH vumlu'be'
jajvetlh cha'pujqut HIjlu'be'ba' (net Sov)
lupwI' mIr DaHejchugh SoH
bIvangpa' QoghIjlIj yIlo'
'ej SaH vay' DanIHlaHbogh 'e' yI'ol
jaj veb vaq De' chu' maqwI'
lujchu'qu'mo' wej HejwI'
'ej HeSqoqmo' Haghrup Hoch Sep nganpu'
vabDot taghpa' rIn HeS QIp
pop luDIllaHbe' tlhIbwI'
narghlaHpa' jon vay' 'e' 'aqlu'
'ej teH: SIbI' cha' ghuvvetlh Deq
qop ghan'Iq 'ej bIghHa'Daq wegh
'ach Do' jul'e' 'ej narghta' Dorpa' pov
jatlh: QI'yaH! wa' ghIgh neH vISuq!
DaH HeSwI' yInvam vIlorup
not jInIHqa'! tagh latlh yInwIj bov
jul tennuS, ghaH Dun law' Hoch Dun puS
wa' jaj net maq, tagha' net Sov
jul tennuS, ghaH Dun law' Hoch Dun puS
not nIHqa' ghaH, tagh latlh yInDaj bov
(chaq nIHqa' 'ach tagh latlh yInDaj bov)
SIbI'Ha' qaS latlh 'ay'mey...
Page updated
Google Sites
Report abuse